Kasunod it daeayong pagguwa it warrant of arrest kontra kay Atty. Harry Roque, kampante si Criminal Investigation and Detection Group (CIDG) Director Major General Nicolas Torre III nga mataeupangdan man ro lokasyon it nagatagong dating opisyal.
Suno sa batikang heneral, insigidang nagbilog ro CIDG it mga tracker team ag gindeploy para usuyon si Roque.
Madumdumang ro CIDG man ro nagdihon it complaint kontra sa dating presidential spokesperson bangud may kaangtanan sigon imaw sa human trafficking activities nga gina-imbolbaran it Lucky South 99, ro ginaturo nga mabahoe nga Philippine Offshore Gaming Operator (POGO) hub sa probinsya it Pampanga.
Ku nagtaliwan nga adlaw it Huwebes kat kat magpaguwa it warrant ro sangka local court sa Angeles City, Pampanga kontra kay Roque. Kaibahan man kara si Cassandra Li Ong, ag 49 nga iba pang indibidwal.
Daywang buean antes ro pagguwa it warrant, eumutaw si Roque sa The Hague, Netherlands para magbulig kunta sa kaso ni dating Pang. Rodrigo Duterte nga presenteng naka-detine sa International Criminal Court.
Uwa nag buhay, ginpahayag ni Roque nga nag-apply imaw it asylum sa Netherlands bangud sa political persecution sigon nga ginahimo kana iya sa Pilipinas.
