KALIBO, Aklan — Ginkumpirma it Police Regional Office 6 nga ‘generally peaceful’ ro hasta sa ika-ap-at nga adlaw it filing it Certificate of Candidacy sa nagkaeain-eain nga lugar sa Western Visayas.
Sa interview it Bombo Kalibo, ginpahayag ni P/Lt. Col. Arnel Solis, spokesperson it PRO-6 nga padayun ro andang monitoring sa sitwasyon sa filing it COC ag nagaeaum nga magadere-deretso ro maayos nga sitwasyon hasta sa Oktubre 8.
Kapin sa 300 sigon nga pulis ro gindeploy sa bilog nga Western Visayas sa mga gintaeana nga venue agud nga masiguro ro maayos ag eowas nga pagdihon it COC it mga magakandidato.
Apang kabilugan nga 3,200 nga PNP personnel ro nakabantay sa bilog nga rehiyon para sa police visibility, crowd control, traffic ag iba pang police interventions .
Dugang pa ni Solis nga ginapadumdum man sa mga kapulisan nga siguraduhon nga magiging non-partisan agud nga malikawan ro anumang isyu.
Kaeabanan sigon nga gina-reassign it PNP ro mga pulis nga may mga igbata nga magapadaeagan sa eleksyon sa kaparehong lugar kun sa siin sanda presente nga naka-duty.
Kadungan kara, nagpaguwa sigon it mandu si regional director P/Brig. Gen. Jack Wanky sa mga unit commanders nga pahauman ro pag-umpisa it Election Period sa Enero 2025 maskin nga owa pa man sanda it may na-monitor ukon natumod nga election areas of concern sa rehiyon.
