KALIBO, Aklan–Ginpaathag ni Kalibo Public Market Supervisor Mr. Abel Policarpio nga ginahueat pa nandang maaprubahan ro ginasugid nga loan sa bangko it lokal nga gobyerno antes nga maumpisahan ro konstruksyon it tindahan.
Suno kana, nakasalalay sigon ro mga plano kara sa LGU kamana man nga ginahueat pa nanda nga mai-release ro pondo nga pagagamiton sa uman nga pag-ayos it Kalibo Public Market.
Antes raya, kinahang-ean sigon nga siguraduhon anay nga maayos ag kompleto eon ro lugar kung siin iga-relocate ro mga apektadong vendors.
Nasayuran nga plano it lokal nga gobyerno nga i-relocate ro mga vendors sa Brgy. Andagao kung siin dikara anay sanda temporaryong magabaligya engkaso nga maumpisahan eon ro konstruksyon it nasambitang merkado publiko.
Madumduman nga nasunog ro haeos 80 porsyento nga bahin it public market ko Setyembre 15, 2019 kung siin, 276 stalls ro naabo nga nagtuga it P35 milyon nga danyos.
