KALIBO, Aklan—Gin-umpisahan makaron nga adlaw, Hulyo 28 it Police Regional Office ukon PRO 6 ro caravan agud nga mag-proseso it mga aplikasyon para sa lisensiya it mga baril sa probinsiya it Aklan.
Suno kay Lt. Richard Lumbres, hepe it Firearms and Explosive Section it RCSU 6 nga ro caravan hay ginpangunahan it PRO-6 ag ginpatigayon sa kampo it Aklan Police Provincial Office.
Raya hay nagatau it “One-Stop-Shop” para sa mga gun owners agud nga maka-comply it mga nagakaigo nga requirements para sa andang aplikasyon para sa License To Own and Possess Firearms ukon LTOPF ag firearms registration.
Ro caravan hay nagatanyag it bulig sa mga gun owners nga ma-check kon active pa ro andang mga accounts ag pag-obra it account sa mga owa pa, pagproseso sa andang bayad sa finance service para sa police clearance online, neuropsychiatric test ag drug test.
Mag-eowas kara, nagbo-oe man it abogado nga maga-notaryo sa andang application form.
Tuyo it aktibidad nga mapanaba ro numero it unregistered firearms sa Western Visayas.
Ro unregistered ukon loose firearms suno kana hay ro mga dati eon nga narehistro nga armas apang owa na-renew.
Nagnaba sigon ro registration ko tiempo it pandemic ag election period.
Samtang ro iba hay nagataeang sa mga requirements ag nagakinahangean it online registration.
Gindugang pa ni Lumbres nga base sa records halin sa Firearms and Explosives Office, ro Aklan hay may masobra sa 4,000 nga unregistered firearms hasta mayo 2022.
Ro caravan hay magatapos sa adlaw it Biyernes.
