KALIBO, Aklan—Gina-abangan it Filipino-American community sa New York ro magiging panindugan ni President Ferdinand “Bongbong” Marcos Jr. sa relasyon it Pilipinas sa Amerika.
Suno kay Bombo International Correspondent Greg Aguilar nga raya ro gustong masayuran makaron it mga Pilipino sa nasambit nga nasyon matapos nga ro dating administrasyong Duterte hay hayagan ro pagpahayag nga mas gustong maging close sa China kaysa sa US.
Samtang, gindugang pa ni Aguilar nga posibleng nagahueag eon makaron ro Philippine Consul General sa New York agud nga maka-imbita it mga interesadong Pilipino nga makatambong sa pagtililipon kaibahan si Pangueong Marcos sa anang nakataeanang state visit sa nasambit nga nasyon.
Posibleng magakangay man suno kana it mga Fil-Am leaders halin sa ibang estado para sa nasambit nga okasyon agud nga makapamati sa mga plano kara para sa Pilipinas sa sueod it anang termino.
Apang ”wait and see” sigon ro attitude it majority it mga Pinoy nga owa nagboto kay Marcos ko nagtaliwan nga eleksyon kon maga-attend.
Nagapati imaw nga dapat eon nga mag-move on ag suportahan ro lider nga presenteng nagadumaea sa nasyon.
Si Marcos hay nakataeanang magatambong sa United Nations’ General Assembly nga pagahiwaton sa New York.
Suno kay Aguilar nga manami raya nga kahigayunan sa presidente agud nga makasalamuha ro iba pang mga lideres it nagkaeain-eain nga nasyon nga magatambong sa nasambit nga event.
Raya ro magiging kauna-unahan nga kahigayunan ni Marcos nga makilaea ro world leaders.
