KALIBO, Aklan — Gina-istoryahan makaron sa banwa it Tangalan ro gina-alegar nga aswang nga naispatan it pilang mga residente pasado alas-9:00 gabi-i it Domingo, Agosto 25 sa kilid it baybay sa Purok 1, Brgy. Dumatad, Tangalan.
Suno kay Rony Traje, sangka mangingisda ag residente it nasambit nga lugar nga samtang naga-ihi sa kilid it payag nga anang gina-eugban hay may nabatian imaw nga matsa may nag-sigwik ag kat anang gintan-aw nakita nana ro sangka itom nga tawo nga nagakamang nga indi kara matumod kon eaeaki ukon babaye.
Owa eon sigon nana naisipan nga boe-an it video ro gina-alegar nga aswang bangud nga humarurot eon imaw it daeagan paagto sa anang mga katrabaho sa basnig bangud sa sobrang nerbiyos nga nabatyagan .
Ginklaru nana nga bukon imaw it hilong ko mga oras nga nakita nana ro ginasugid nga aswang .
Madumduman nga ko nagtaliwan nga tatlong adlaw, gina-alegar nga sangka babayeng aswang ro nakita sa pihak nga lugar partikular sa Purok 3 nga naga-kamang sa kurae .
Gin-eagas sigon raya it mga residente apang owa nanda naabutan .
Sa makaron hay owa man it napabalita nga naduea nga residente sa andang lugar.
Matapos ro insidente, makapamatuod eon sigon imaw nga matuod ro aswang nga dati hay owa nana ginapatihan.
Nasayuran nga ko nagtaliwan nga mga dinag-on hay naging paealigban man sa mga pumueuyu ro pag-atake it indi matumod nga sapat sa mga alagang manok kun sa siin wakwak ro dughan ag owa ro mga kasudlan ag ginsuyop ro dugo.
Sa pihak nga parte, ginpahayag ni Marivic Venancio , sangka residente sa lugar nga gin post nana ro natabu sa social media agud nga mataw-an it paandam ro mga pumueuyu eabi eon ro mga inunga ag nabdos nga maging alerto sa tanan nga oras bangud sa posibilidad nga may kamatuoran ro napabalita nga aswang.
Suno kana nga sa kauna-unahan nga kahigayunan hay nakita nana si Rony, sambilog sa andang tawuhan sa basnig nga nagapang-eupsi ag nagakurog bangud sa sobrang nerbiyos.
Dugang pa nga nakibot eon lang imaw kat makita nga nagakagulo ag nagaronda ro mga tawo sa guwa it andang baeay.
