KALIBO, Aklan—Pilang adlaw antes ro Barangay ag Sangguniang Kabataan Elections 2023, sangka 39-anyos nga negosyante ro nagpasaka it vote buying sa taeatapan it Commission on Elections ukon Comelec Aklan kontra sa nagapadaeagan nanda nga barangay kagawad it Brgy. Libas, Banga.
Suno sa tagreklamo nga si Eddie Andrade, residente it nasambit nga lugar nga ko Oktubre 25 hay nagpa-blotter imaw sa Banga Municipal Police Station agud nga ireklamo ro nagapa-ilihir nga kagawad nga si Palmy Meliton matapos nga gina alegar nga nag agto sa andang baeay ko agahon it Oktubre 21 kaibahan ro iba pang kandidato ag nag-aywan it mga leaflets ag sobre nga may sueod nga P500 pesos sa anang 16-anyos nga unga.
Kaibahan it kwarta ro litrato it ginareklamo nga kandidato.
Ginpahayag dugang nga bandang alas-11:30 it agahon it nasambit man nga adlaw hay nag agto sa anang meat shop si Meliton kaibahan ro anang asawa ag nagpangayo it pasaylo bangud sa pag aku nga nag-eabag sanda sa elections laws.
Gin-insister it tagreklamo nga gusto eamang nana nga protektahan ro anang menor de edad nga unga sa mahigku nga nagakatabu nga kalakaran sa eleksyon.
Mag-eowas kara, medyu nainsulto sigon imaw sa natabu nga vote buying.
Nasayuran nga mag eowas kana hay gintaw-an man it sobre it nasambit nga kandidato ro anang ama nga may sueod man nga kwarta.
Matapos nga makompeto ro mga nagakaigo nga dokumento hay gin baton it Comelec Aklan ro anang reklamo.
Sa oras nga mapamatud-an it Comelec nga nag-eabag ro kandidato sa ginataeana nga laye hay posible sanda nga madisqualify.