KALIBO, Aklan — Tunga roopinyon it mga miyembro it Sangguniang Bayan (SB) it lokal nga gobyerno it Malay angot sa gina dusong himuon nga P500 maghalin sa P75 ro gina sukot nga environmental fees sa uman nga pagbukas it isla it Boracay sa Oktubre 26.
Raya hay kasunod it naging paandam ni Department of Interior and Local Government (DILG) Undersecretary Epimaco Densing III nga magpasaka it second wave it mga kaso kontra sa pilang opisyal it LGU-Malay bangud sa mga discrepancy sa koleksyon ag paggamit it environmental fees sa isla.
Sa interview it Bombo Radyo, gin pamilit ni SB member Nenette Aguirre-Graf nga ro proposisyon hay gin kasugtanan sigon nanda it mga
stakeholders ag iba pang opisyal.
Gin klaro kara nga ro $10 ukon katumbas it masobra sa P500 nga environmental fees hay para eamang sa mga foreigners.
Makabulig sigon raya agud mas pang mapa-eago ro ekonomiya pinaagi sa pagkrear it trabaho ag pangabuhian sa mga residente.
Kaeakip sa anang plano ro paghimo it mga eco-friendly bags gamit ro katsa nga igapakigbahin sa mga turista, kun siin nakabaehag kara ro mga do’s and don’ts samtang naga bakasyon sa isla.
Kaeakip sa eco-bag ro tumbler ag straw nga pagagamiton samtang nga sa Boracay kasunod it proposisyong pagbawae sa pagbaligya ag paggamit it mga plastic bottles.
Sa pihak nga parte, gin pahayag ni SB member Jupiter Aelred Gallenero nga owa sa tamang “timing” ro proposisyon ni Graf bangud sa naga padayun nga rehabilitasyon sa isla.
Gusto man ni SB member Floribar Bautista nga mas unahon ro proposisyong pag-amyenda sa gina patuman nga ordinansa may kaangtanan sa environmental fee.
