Makahawat-hawat ro ginaabangan nga semi-finals match sa tunga it mga koponan nga maga-engkwentro para makasueod sa finals agud nga may tyansa nga makuhit ro tropeyo sa nagapadayon nga FIFA World Cup 2022 sa Qatar.
Suno sa football analyst nga si Zaph Castillo, interesting ro prestihiyosong tournament makaron nga dag-on matapos nga napyerde it underdog nga Morocco ro mabagsik nga koponan it Portugal nga ginakaeakipan it star player nga si Cristiano Ronaldo.
Nagpokus sigon sa depensa ro Morocco rason nga gin-istoryahan sa bilog nga kalibutan ro nailista kara nga kasaysayan bangud nga sanda ro unang Arab ag African country nga umabot sa semifinals it FIFA World Cup.
Samtang, ginbali it koponan it France ro sumpa sa pilang dekada it World Cup bangud nga may ginatawag sanda nga champions curse nga ro buot hambaeon nga kon nagkampeon ka eon sa tournament hay inde ka eon magdaog it uman.
Ulihi nga natabo ro grand slam sa koponan it Brazil bangud magkasunod nanda nga pagkampeon ag uwa eon raya nasundan it ibang koponan sa pilang dekada nga nagtaliwan.
Naging consistent suno kana ro France rason nga ginpamatud-an kara nga makaabot sand sa semis.
Sa nasambit nga world cup nakit-an ro kalig-on bukon eamang it sa mga manughampang kundi sa bilog nga koponan halin sa umpisa hasta sa nagapatapos eon ro prestihiyosong hampang.
