KALIBO, Aklan–Nagapadayun ro imbestigasyon it New Washington Police Station sa nakitang gina-alegar nga siki it bag-ong tawo nga eapsag sa sangka bakanteng lote sa prente it Pink Sisters convent sa Brgy. Polo sa banwa it New Washington.
Base sa report, nakibot ro tatlong magkabarkada kat makita nanda ro parte it eawas it sangka eapsag nga una eon sa state of decomposition ko Martes nga adlaw.
Suno kay Richard Felizardo nga magapanaksay kunta sanda kaibahan ro anang mga barkada nga sanday Junlee Andrade,certain Rojan.
Pag-agi sa nasambit nga lugar paagto sa baybay hay nakita nanda ro sangka garbage bag nga may sueod nga duster ag adult diaper nga may mga mancha pa it dugo.
Apang eubus sanda nga nakibot kat makita sa unahan ro sangka siki it eapsag.
Insigida nanda nga ginpahisayod sa mga otoridad ro andang nakita.
Antes sigon nga nakita ro siki it eapsag hay nakahugum ro pilang naga agi sa lugar it medyu mabaho nga hugum.
Nagaduda ro pilang otoridad nga posibleng gin-aywan it buhi ro eapsag sa guwa it gate it kumbento ukon pwede man nga patay eon ag gintaban it mga kasapatan
Samtang, ginpahayag ni Kagawad Ariel Relado, OIC punong barangay it Polo, New Washington nga nagapabilin nga paealigban kanda ro insidente.
Owa man sigon it record sa Rural Health Unit (RHU) it mga nagpa-check up nga nabdos sa lugar nga posibleng ina it eapsag.
May pagduda man nga basi taga ibang lugar ro may kahimuan kara.
Ro parte it eawas it eapsag hay ginbutang sa karton ag gin eubong eon lang sa sementeryo.
Samtang, sa pihak nga parte, ginpahayag man ni P/Cpl. Jhon Lee Valencia it New washington PNP nga takna 8:20 kat nakabatun sanda it tawag maghalin kay Frankie Salazar kung sa siin naga-imporma nga may sangka siki it eapsag nga nakit-an sa nasambitan nga lugar.
Gilayon man nanda rayang ginrespondehan ag sa andang pag-usisa sa lugar andang nakit-an ro ayam nga medyo may ginakaon meapit sa diaper nga duguan pilang metros eamang ro distansiya sa nagakaeonot nga siki it ginapatihang bag-ong tawo nga eapsag.
Gilayon man nanda rayang gihimos ag ginsueod sa karton ag gin-eobong sa sementeryo.
Sa makarun hay nagapadayun pa ro imbestigasyon it News Washington PNP sa nasambitan nga insidente.
