KALIBO, Aklan—Makabig nga economic blackmail ro ginaduso it gobyerno nga no bakuna, no ayuda policy.
Raya ro ginpahayag ni Kim Sin Tugna it Bagong Alyansang Makabayan ukon Bayan-Aklan.
Suno kana nga bukon it makatarungan nga obligahon ro mga benepisyaryo it Pantawid Pamilyang Pilipino Program ukon 4Ps ag mga senior citizens nga magpabakuna kontra sa COVID-19 agud nga mabo-oe ro andang ayuda.
Sa baylo, kinahangean suno kana nga tutukan it gobyerno ro andang vaccine information drive antes nga magplastar it nasambit nga mga kondisyon.
Ro pagpamalibad suno kana it iba nga magpabakuna hay resulta it palpak nga pagbuyot it administrasyong Duterte it pandemya.
Gindugang pa ni Tugna nga ro yabe agud nga maengganyo ro mga tawo nga magpabakuna hay ro pagtau kanda it tamang edukasyon angot sa ikamayad nga eawas.
Kinamatarung suno kana it tanan nga makabaton it ayuda sa tunga it naexperiensiyahan nga krisis.
Owa it kundisyon nga dapat nga ipatong antes nga taw-an it bulig ro mga tawo bangud nga responsibilidad sigon raya it gobyerno.
