KALIBO, Aklan—Nagapaabot it anang pagkontra si Aklan 2nd district congressman Teodorico “ Nonong” Haresco may kaangtanan sa planong igaduso it kongreso nga Boracay Island Development Authority (BIDA) bill sa pagpanguna ni Davao Representative Paulo Duterte.
Suno kay Aklan 2nd district congressman Haresco nga madueaan it kapin sa P200 hasta P230 billion nga kita ro probinsya it Aklan engkasong maaprubahan ro nasambitan nga proposisyon.
Aminado man raya nga ko una hay anang ginsuportahan ro pagtukon it BIDA bill sa pagpanguna ni Congressman Duterte apang kat naggua eun raya hay medyo kakaiba sigon ro naging kaungdan kara.
Unnumbered version it BIDA bill sigon raya kung sa siin nagatuyo nga magtukod it sangka private corporation nga imaw ro magatake-over sa Boracay kaibahan ro Catictan airport, Jetty port , ag daywang ka mga barangay sa banwa it Nabas nga imaw ro Brgy. Unidos ag Pawa.
Medyo maeayo sigon raya sa andang gin-istoryahan ag bukon ro pamanaw eun hay negosyo.
May kaangtanan kara, anang ginapangayo ro bulig ni Pangueong Rodrigo Duterte agud makaangkon it patas nga desisyon ag maaprubahan ro sandig eamang sa andang gin-istoryahan.
Nasayuran nga ro legal framework it BIDA hay ginapamaeabagan man it tanan nga liga sa Aklan, kapareho it SK, mga mayor, councilors, ag mga kapitan.
