KALIBO, Aklan–Ginaproponer makaron it sangguniang bayan it Kalibo ro pagpatuman it “no movement Sunday” policy bangud sa nagatinaas nga kaso it coronavirus disease 2019 (Covid-19) infections.
Suno kay SB member Ketchie Luces, chairman it committee on health nga raya hay ginatun-an pa nanda kaibahan ro iba pang natungdan nga ahensiya it gobyerno matapos nga matalakay sa andang ginpatigayon nga session.
Sambilog sigon raya sa covid response it banwa matapos nga makalista it daywang namatay nga vendor sa Kalibo public market nga nagpositibo sa coronavirus.
Apang ginatun-an pa kon bilog nga kalibo ukon sa merkado publiko eamang kara iga-impose ro ‘no movement Sunday’.
Mag-eowas kara, ginaduso man ro pagpatuman it 2-entry, 2 exit policy sa tindahan ag ro hugut nga pagsunod sa minimum health protocols eabi eon ro pagsuksok it face mask, face shield ag ro pag-obserba it physical distancing.
Sa pihak nga parte, gindugang pa ni SB Luces nga natalakay man nanda sa nagtaliwan nga session ag ginsuportahan ro planong pag-usoy it eugta para sa covid burial grounds ag ro pagsueod ni mayor Emerson Lachica sa joint venture sa sangka funeral homes sa pagtukod it kaugalingon nga crematorium.
Ro nasambit nga rekomendasyon hay igapaabot sigon nanda kay mayor Lachica para sa anang approval.
