KALIBO, Aklan—Ginsuhestiyon ni Malay sangguniang bayan member Alan Palma Sr., nga makaangkon pa it dugang nga konsultasyon ro ginaduso nga West Aklan Special Economic Zone Act ukon WASEZA.
Raya hay kasunod sa pag-eakip sa isla it Boracay sa mga lugar nga kinahangean pa nga i-develop sa pihak nga fully developed eon sigon raya.
Owa it kwestiyon suno kay Palma ro ibang mga lugar nga kaibahan kara kapareho it Caticlan sa Malay kamana man sa barangay Poblacion, Tagas ag Baybay sa Tangalan ag barangay Poblacion, Aslum, Bagacay, Colong-Colong ag Laguinbanua sa Ibajay bangud nga nagakinahangean pa ro mga raya it development.
Ginpamilit ni Palma nga dapat nga makaangkon it multi-sectoral consultation eabi eon sa mga lokal nga opisyal, business ag iba pang sektor sa Boracay agud nga maklaruhan ro tanan partikular sa bentaha ag disbentaha it ginaduso nga hagna.
Nasayuran nga nagdihon si House Committee on Economic Affairs Vice Chairman ag Aklan 2nd District Rep. Teodorico Haresco Jr., it proposed WASEZA agud nga makatau it dugang nga investment ag trabaho sa rehiyon ag maka-amot sa pagbangon it ekonomiya it nasyon ag development.
Ginpahayag dugang ni Palma nga owa it maeain kon maga-explore ro gobyerno it bag-ong special economic zones ag mapabaskog ro ekonomiya it kada rehiyon agud nga makatuga it maabu nga trabaho ag maka engganyo it foreign investments basta nga may transparency.
