KALIBO, Aklan—Ginaeauman nga mas pang magataas ro tourists arrivals sa isla it Boracay matapos nga bukon eon it mandatory ro pagsuksok it facemasks sa mga turista ag bisita sa mismong isla ag mainland Malay.
Raya hay kasunod it ginpaguwa nga Executive Order No. 26 ni Malay Mayor Frolibar Bautista angot sa direktiba ni Pangueong Ferdinand Marcos, Jr. sa boluntaryong pagsuksok it facemask sa bilog nga nasyon.
Suno kay Mr. Felix Delos Santos, Chief Tourism Operations Officer nga mataw-an eon kara it kahigayunan ro mga bisita nga makahanggop it fresh air samtang nga nagatikang-tikang sa puti nga baeas sa front beach it isla.
Apang base suno kana sa executive order, magiging mandatory gihapon ro pagsuksok it facemasks sa mga may immunocompromised, mga senior citizens, ag owa it bakuna sa COVID-19 agud nga malikawan ro paeag it nasambit nga sakit.
Obligado man ro pagsuksok kara sa sueod it mga matawong lugar, public transport ag mga indoor venues.
Sa pihak kara, may mga hotels ag iba pang establisimento nga gina require gihapon ro pag-face mask.
Mataeupangdan man sigon nga maabu gihapon nga mga pumueuyu ro nasanay eon sa pagsuksok it facemask.
Nasayuran nga sa makaron hay nagapabilin nga manaba ro kaso it COVID-19 sa probinsiya ag mabuhay eon nga una sa idaeum it alert level 1.
Mag-eowas kara, ro Aklan hay sambilog sa may pinakamataas nga vaccination rate sa bilog nga nasyon.
