KALIBO, Aklan—Ginaeauman nga sa 3rd quarter pa it presenteng dag-on maga-abot ro mga supply it bakuna nga gin-purchase it tagsa-tagsa ka mga Local Government Unit (LGU).
Suno kay Aklan Governor Florencio Miraflores nga owa pa it anumang LGU ro nakabakae it bakuna kontra COVID-19.
Tanan suno kana nga transaksyon it mga lokal nga gobyerno sa pagbakae it bakuna hay maga-agi sa national government.
Sambilog sigon sa mga unang nakapirma it supply agreement hay si Iloilo city Mayor Jerry Treñas apang ro supply hay ginaeauman nga mag-abot sa buean pa it Hunyo ukon Hulyo.
Suno pa sa gobernador nga ro mga bakuna nga nag-abot makaron sa Pilipinas hay mga COVAX Vaccine nga inisyatibo it World Health Organization (WHO).
Sa pihak kara, nag-alokar man suno kana ro gobyerno probinsyal it kapin sa P200 million nga pondo para sa pagbakae it bakuna partikular sa kompaniyang AstraZeneca ag Novavax.
Sa kamatuoran suno kay Miraflores hay nakapirma eon sanda it term sheet halin sa Novavax para sa inisyal nga 200,000 doses it COVID-19 vaccine apang posibleng sa 3rd quarter pa it dag-on maga-abot ro mga supply kara.
