KALIBO, Aklan—Ginahueat pa it local government officials sa Aklan ro desisyon it Boracay Inter-Agency Task Force (BIATF) kon buksan ro isla it Boracay para sa mga domestic ag foreign tourist.
Ginapabutyag nga ro BIATF pinaagi kay tourism officer Bernadette Romulo-Puyat hay uwa pa nakata-o it go signal para sa isla sa pagbukas kara sa mga lokal ag international tourist kon sa siin balak kunta it LGU Malay ag Aklan provincial government nga makaangkon it grand opening sa buean it Oktobre.
Apang, uwa pa it naging sabat ro national government sa andang ginpasa nga rekomendasyon agud nga uman nga mabuksan ro sikat nga isla para sa mga turista mag-eowas sa mga taga-Western Visayas nga nauna eon nga ginpasugtan nga makabisita ag makabakasyon sa Boracay.
Sandig sa joint resolution No. 2020-01 ni Malay Mayor Frolibar Bautista ag ni Aklan Governor Florencio Miraflores, ginaayo it mga raya sa BIATF nga masalbar ro industriya it turismo halin sa grabe kara nga pagkalugi tuga ko nagapadayon nga paeag it coronavirus disease ukon Covid-19 sa bilog nga kalibutan.
Sa nasambit nga resolution, nakabaehag nga kon pagataw-an sanda it go signal hay ro pagapasugtan eamang nga makasueod nga turista hay halin sa mga lugar ukon nasyon nga uwa eon it nailista nga kaso it Covid-19 kon sa siin hugot man nga igapatuman ro minimum health standards agud nga malikawan ro pagkalhit it virus.
Sa raya nga pamaagi hay amat-amat nga makabangon ro turismo nga may mabahoe nga ambag sa ekonomiya it nasyon.
Ro tikang ag desisyon it Aklan officials hay ginsuportahan man it mga stakeholders kaparehas it Boracay Foundation, Inc. (BFI), Philippine Chamber of Commerce and Industry (PCCI), Boracay Land Transport Multi-purpose Cooperative (BLTMPC), Caticlan Boracay Transport Multi-Purpose Cooperative (CBTMPC), Compliant Association of Boracay (CAB) ag Boracay Watersports Association (BSA).
