KALIBO, Aklan—Kasunod it ginpatigayon nga public consultation, ginahueat makaron ro guidelines it regional office it Land Transportation Franchising and Regulatory Board ukon LTFRB, Land Transportation Office ag mga transport group angot sa pagsuksok it face shields it mga pasahero sa pagsakay sa mga pampublikong transportasyon umpisa sa Agosto 15, 2020.
Suno kay Engr. Marlon Velez, head it LTO Aklan nga bilang law enforcement arm it Department of Transportation ukon DOTr, kinahangean nanda nga ipatuman ro mandu.
Ginklaru man ni Engr. Velez nga sa maabot nga Agosto 16 hay puro warning anay ro andang pagahimuon sa mga maga-eabag kamana man ro pag monitor sa mga driver it public transport nga ipadumdum sa andang mga pasahero ro pagsuksok it face shield ag pagbutang it karatola nga “No Face Shield, No Ride” policy.
Ro mandu hay aplikable eamamng suno kana sa mga pasahero ag bukon it sakop kara ro mga drivers kamana man ro mga pribadong saeakyan.
Owa pa sigon sanda nakasayod kon pila ro penalidad ag multa.
Madumduman nga nagpaguwa ro DOTr it Memorandum Circular 2020-014 angot sa nasambit nga mandu.
Makarondaya man ro patakaran sa mga pasahero nga nagasakay it pampasaherong barko.
Mag-eowas sa mandatory face shields, kinahangean sa gihapon nga ipatuman ro minimum health standards kapareho it pirmeng paghugas it alima, pagsuksok it face masks, ag physical distancing.
Sa pihak nga parte, minimal suno kana ro nagagamit it protective barrier nga requirements agud nga mapasugtan ro angkas sa mga mag-asawa ukon live in partner nga nagasakay it motorsiklo.
