KALIBO, Aklan—Magapangatubang sa kasong pag-eabag sa Republic Act 9165 ukon Comprehensive Dangerous Drugs Act of 2002 ro sangka 60-anyos nga eaeaki matapos nga madakpan sa ginkasa nga drug buy-bust operation sa mismong panimaeay nanda sa Brgy. Tigayon, Kalibo.
Ginkilaea ro suspek nga si Hedy Mamay, nagatrabaho sa ticketing outlet it ceres terminal kon sa siin nabuoe kana ro sangka sachet it suspected shabu kabaylo it kapin sa P50, 000 pesos nga buy-bust money.
Sa pagbody search sa suspek, nabuoe dugang ro an-om ka sachet it nasambit nga illegal nga droga nga nagaabot sa haeos P340, 000 pesos ro haega it suspected shabu nga narekober kana.
Si Mamay nga ginakabig nga high value indibidwal hay dati eon man nga nadakpan ag nakulong bangud sa kaparehong kaso apang temporaryong napahilway bangud sa plea bargaining.
Haeos sang buean eon nga ginasubaybayan ro suspek nga nagaduso it illegal nga droga ag ro kontrabando hay nagahalin pa sa Metro Manila.
Ro nasambit nga operasyon hay ginkasa it Regional Police Drugs Enforcement Unit ag Kalibo Municipal Police Station.
Si Mamay hay una eon sa kustudiya it pulisya para sa nagakaigong disposisyon.
