KALIBO, Aklan—Ginakalipay makaron it maabu nga mga illegal immigrant ag foreign student ro ginaduso nga laye sa Espansya.
Raya hay kasunod it nagahilapit eon nga pag-apruba sa sangka hagna nga nagabulig sa mga illegal immigrant ag foreign student sa nasambit nga nasyon.
Suno kay Bombo International Correspondent Maria Edzel Lamparero Lopez, sa idaeom it laye ginataw-an it pabor ro mga nagsueod nga illegal immigrant sa andang nasyon kung siin kinahang-ean nanda nga makapa-enroll sa eskwelahan antes ro 60 diyas.
Pwede sigon nga gamiton it mga raya ro enrollment form nga i-apply para makabuoe it residence permit samtang naga-eskwela sa sueod it sang dag-on.
Pagkatapos hay pagataw-an sanda it renewal sa sueod it daywang dag-on kung siin pwede sanda nga legal nga maka-ubra ukon makasueod ag guwa sa Espanya.
Samtang, ro mga foreign student hay ginataw-an man it kahigayunan nga makatrabaho sa sueod it 30 oras kada dominggo halin sa dating 20 oras eamang.
Nasayuran nga may una nga masobra tunga sa milyong illegal immigrant ag 50,000 ka mga foreign student sa Espanya.
