KALIBO, Aklan—Gin-imbita it mga otoridad sa Banga municipal police station ro tatlong ka mga trabahador para sa ginapatigayon nga imbestigasyon angot sa pagkutkot it eugta sa Barangay Dingle, Banga.
Suno kay Barangay Kapitan Ricky Raquin it Brgy. Dingle, Banga nga ro tatlong ka mga persona hay tawuhan ni Rafael Palmon ag residente it banwa it Makato apang may eugta sa nasambitan nga lugar.
Nauna eun nga ginpapundo it Department of Environment and Natural Resources ukon DENR ro pagkutkot sa nasambitan nga lugar hasta nga owa pa it kompleto nga papeles angot kara.
Sa pihak nga parte, hugot man sigon nga gina-insister it tag-iya it nasambitan nga eugta nga nagakotkot eamang raya it bubon nga pwedeng makabitan it water pump nga pagagamiton kunta sa andang piggery
Samtang sa pihak nga parte, ginklaro man ni Barangay Kagawad Marcelo Protacio it Barangay Dingle, Banga nga nagakutkot eamang ro mga tawuhan ni Palmon bangud sa gina-ubra nga bubon ag bukon it bangud nga nagamina ag naga-usoy it bueawan.
Raya eamang sigon hay may 10 feet ro kataason ag 4×4 ro eapad kapareho it pundasyon it CR.
May nagaguwa eun man sigon nga tubi apang bukon pa it bastante.
Sa makarun suno pa kana hay ginpapundo it mga otoridad ro pagkotkot it mga raya ag ginkumpiska pa ro andang jack hammer ag gineaygayan eun lang nga magbo-oe it permit antes nga ipadyun it uman ro andang proyekto.
