KALIBO, Aklan—Naka-impound makaron sa Makato Municipal Police Station ro gina-alegar nga get-away vehicle nga kulay itom nga motorsiklo nga narekober sa baeay it ginikanan it suspek nga si Delsol Zunio Jr., sa Barangay Polo, Banga, Miyerkules it agahon, Mayo 1.
Nauna eon nga ginpahayag ni PCapt. Benny Jones Mendoza, hepe it Banga Municipal Police Station nga nakipag-angot kanda si P/Capt. Mark Darrell Villanueva, acting chief of police it Makato PNP agud nga magpatigayon it joint operation agud nga marekober ro nasambit nga motorsiklo nga ginasugid nga gingamit sa krimen.
Sa ginpaguwa nga CCTV footages, naggamit ro mga suspek it motorsiklo sa pagpaeagiw matapos ro pagbaril ag pag-agaw sa plastic bag nga may sueod nga mabahoe nga kwarta halin sa biktimang si Jan Andrei Bolido ko Abril 27 it agahon sa Barangay Dumga, Makato.
Sa backtracking sa mga CCTV, nag-agi ro mga suspek sa Dumga, Makato diversion road paagto sa Numancia.
Nagapati man ro mga kapulisan nga owa pa nakaguwa it probinsiya it Aklan ro sambilog sa mga suspek.
Sa resulta it autopsy sa eawas it biktima, narekober ro sangka slug it kalibre .38 nga baril.
Dugang pa nga nakadugang sa andang mga ebidensiya ro narekober nga mga jacket, eambong ag sapatos sa paghaeughog sa sueod it saeakyan ni Zonio nga anang suksok kat natabu ro krimen .
Madumduman nga ro 35-anyos nga si Zonio hay nauna eon nga nagpaeagas sa kapulisan matapos nga magpaeagiw kat parahan it kapulisan sa checkpoint sa Barangay Venturanza, Banga, gabi-i it Lunes, Abril 29.
Narekober ro saeakyan sa tago nga lugar maeapit sa kilid it suba sa Barangay Balactasan sa banwa it Madalag.
Naaresto si Zonio kat gin-balikan ro anang gin-abandonang kotse pagka-aga it Martes kaibahan ro anang amigo agud kunta nga boe-on ro saeakyan .
Mag-eowas sa posibleng paga-atubangon nga robbery with homicide, patong patong nga kaso pa ro igapasaka kontra kana partikular ro reckless driving, ag resistance and disobedience to an agent of a person in authority sa Banga PNP ag pag-eabag sa Republic Act 9165 ukon Comprehensive Dangerous Drugs Act of 2002 sa Madalag PNP matapos nga makita sa sueod it anang kotse ag bag ro an-um nga sachet it ginadudahan nga shabu, ,mga drug paraphernalia, cash nga masobra sa P23,500 ag nagkaeain-eain nga IDs nga nakapangaean kana kaibahan ro ID nana bilang empleyado it J&T Express.
