Kalibo Aklan ——–Sangka ginang ro nagdangop sa Bombo Radyo Kalibo agud nga isaysay kon paalin imaw nga nabiktima it “love scam” sa tunga it nagatinaas nga biktima it nasambit nga scheme sa kasagsagan it quarantine period.
Suno sa ginang nga owa eon nagpakilaea, Disyembre 2019 hay may nakilaea imaw sa social media nga sangka Amerikano .
Pinaagi sa chat online hay nakaangkon sanda it relasyon it anang ginasugid nga “nobyo” nga gina-alegar nga sangka US army nga nagpakilaeang si General Francisco Steve , 53 anyos ag may sangka unga .
Hasta nga ko enero 1, 2020, ginhambaean sigon imaw it eaeaki nga nagpadaea imaw it package nga may sueod nga mga kwarta nga andang nakumpiska halin sa mga terorista .
Ginpangayuan sigon imaw it 37,000 pesos it nagpakilaeang courier service para sa buwis agud nga mabo-oe ro anang package.
Matapos nga makapadaea it nasambit nga kantidad hay nagsunod-sunod pa ro pagpangayo kana it kwarta hasta nga ko ulihi ko mga buean it Agosto hay nag-abot sa kapin sa 1.1 million pesos ro anang natigayon nga mapadaea nga kantidad.
Ulihi eon sigon nana na-realize nga nabiktima imaw it modus .
Naubos sigon ro tanan nanda nga propiedad ag makaron hay maswerteng nataw-an it ilistaran it National Housing Authority.
Problema man sigon nanda makaron ro anang mister nga bedridden eon ag nagakinahangean it dialysis .
Samtang, ginpahayag it ginang nga ginpakamayad nana nga magpaeapit sa Bombo Radyo Kalibo agud nga isaysay ro natabu kana agud nga maga-serbi nga paandam sa iba pa nga posibleng mabiktima man it kapareho nga modus .
Sa pag-usisa sigon nanda sa pagkatawo it suspek, natukiban nga ro pangaean nga anang gingamit hay mabuhay eon nga patay nga US army official.
