KALIBO, Aklan—Sangka 65 anyos nga ginang ro nagdangop sa Bombo Radyo Kalibo agud nga magpangayo it bulig para ma-claim ro lump sum it anang namatay nga mister sa Social Security System ukon SSS.
Suno kay Mrs. Gloria Magsipoc Mabuhay it Barangay Poblacion, Numancia nga ko 2019 hay namatay ro anang asawa nga si Narry Mabubay nga dating OFW sa Taiwan.
Nakabaton sigon imaw it burial benefit kara, apang naka-pending ro anang lump sum para sa dugang nga evaluation it SSS.
Kat maging “disable” sigon ro anang mister bangud sa stroke hay gina-alegar nga ginpabayluhan kara ro anang beneficiary nga imbes si Perlita Agas nga gina-alegar nga dating live-in partner it anang mister sa Taiwan hay imaw ro ginbutang.
Nasayuran nga 1997 kat maging miyembro ro anang asawa.
Sa pihak nga parte, nagpanindugan ro SSS-kalibo nga base sa andang record, nagapabilin nga si Perlita Agas ro asawa ni Narry Mabubay imbes nga si nanay Gloria.
Suno kay Mr. Rene Moises Gonzales, branch manager it SSS-Aklan nga samtang gina-proseso ni nanay Gloria ro mga papeles para sa anang claim hay nadiskubre it taeatapan nga bukon it imaw ro first wife.
Kinahangean sigon nga maka-execute anay it affidavit si Perlita nga bukon it imaw ro unang asawa antes nga mabo-oe ro lump sum it miyembro.
Ginatantiya nga mga 35,000 pesos eamang ro mabaton nga lump sum it claimant bangud nga tatlong buean man lang ro hinueugan it member sa anang SSS.
Gin-insister man ni nanay Gloria nga may nagakaigo imaw nga dokumento nga magapamatuod nga imaw ro unang asawa.
Ginpamilit pa ni Gonzales nga mas madali ro magbaylo it beneficiary sa record apang mabudlay ro magbaylo it asawa bangud nga kinahangean nga ma-declare anay nga patay ukon annulled ro kasae sa first wife.
