KALIBO, Aklan–Nagapabilin nga owa naresolba ro ginlunsar nga protesta it mga miyembro it Nalook-Pook-Caano-Estancia Small Farmers and Homeowners Association ukon Napocacia matapos nga ginbaeabagan ro mga heavy equipment para sa ginapatigayon nga runway expansion project sa Kalibo International Airport ko nagtaliwan nga buean .
Raya ro ginpahayag ni Sangguniang Panlalawigan member Nemesio Neron nga naghana nga magpatunga sa problema.
Suno kana nga nagpangayo kana it bulig ro management it construction firm nga nagdaog sa bidding para sa nasambit nga proyekto.
Apektado sigon ro trabaho it andang mga construction workers dugang pa nga per day ro andang ginabayaran sa pag-renta sa mga heavy equipment nga ginbaeabagan.
Gin-insister it opisyal nga indi dapat nga madaeahig ro construction firm sa owa pagka-ilintindihan.
Nagapati suno kana ro kompaniya nga bangud nga nakaangkon it bidding hay owa eon it problema sa mga dokumento, apang owa nanda ginaeauman nga maigpit sa gulo.
Samtang, gina-demand sigon kana it Napocacia nga paatubangon kanda ro mismong sekretaryo it department of transportation ukon DoTr nga may buyot sa proyekto agud nga iplastar ro andang demand nga kompensasyon, kun sa siin medyu mabudlay suno kana nga mataw-an it katumanan.
Apang suno kay neron nga naipaabot eon nanda ro concern sa DoTR Aklan.
Madumduman nga gina-insister it grupo nga mag-eowas sa andang pangabuhian , kapin sa 800 nga pamilya ro apektado sa expansion project it airport sa pilang mga barangay nga sakop it Kalibo ag New Washington.
Nauna eon nga nagtukod ro grupo sa pagpanguna ni German Baltazar it abang sa runway umpisa ko nagtaliwan nga Hunyo 5 agud nga baeabagan ro mga trabahador sa ginahimo nga pag-aspalto.
