Magiging mabudlay sa mga maisot nga negosyo engkaso nga maging laye ro proposisyon nga nagamandato sa mga kompanya nga taw-an it 14th month pay ro andang trabahador.
Raya ro ginpahayag ni Employers Confederation of the Philippines (ECOP) kasunod it pagsueong it House Bill No. 520 nga gindihon ni Kabayan Party-list Representative Ron Salo.
Suno kay ECOP Vice President George Barcelon, maabung negosyo ro owa pa eubusang nakabangon halin sa pagkaeugmok bangud sa COVID-19 pandemic.
Dugang pa kara nga may pila eon nga mga kompanya ro nagatau it 14th month pay sa andang mga empleyado kon mabaskog ro naging financial performance it kumpanya para sa rato nga dag-on.
Apang engkasong obrahon nga requirement raya, ginpahayag ni Barcelon nga mabudlayan ro Micro-small and Medium Enterprises (MSME) nga raya hay masabat ag magiging paeas-anon eamang kanda.
Sa idaeum it proposisyon, kinahangean nga maitau eon ro 13th month pay kada May 31 bilang pagpahaum sa school enrollment samtang ro 14th month hay igatau antes mag-umpisa ro buean it Disyembre bilang pagpahaum sa Paskwa.
