Pagabutangan it temporayong early warning device ag iwag it Department of Public Works and Highways ukon DPWH aklan ag barangay council ro ginareklamog utod nga daean sa may parte it circumferential road ukon diversion road sa brgy. Calangcang, Makato.
Suno kay punong barangay Neil Tumbukon nga nagpatigayon eon it inspeksyon ro DPWH sa nasambit nga lugar ko nagtaliwan nga adlaw kasunod it andang ginpaabot nga reklamo.
Ginasugid nga takaw aksidente ro lugar bangud sa utod nga karsada matapos nga owa pa naumpisahan it nagdaog nga contractor ro phase 3 it proyekto nga may nakataeanang pondo nga kapin sa 90 milyon pesos.
Gindugang pa ni kapitan Tumbukon nga natapos eon ro phase 1 ag 2 it proyekto rason nga may nagakaigo raya nga mga iwag ag maayos ro karsada.
Madumduman nga gin-uean it reklamo ro nasambit nga taeatapan bangud sa sunod- sunod nga aksidente sa nasambit nga parte it kalsada ko nagtaliwan nga mga inadlaw kun sa siin sambilog ro napabalitang namatay.
Mag-eowas nga bukon it pamilyar sa lugar ro pilang mga naga-agi hay ginareklamo man ro kawad-an it bastante nga mga warning signs ag iwag rason nga gin-aksyunan eon .
