Gin-usisa ni House Quad Committee co-chairman ag Manila 6th district Rep. Bienvenido “Benny” Abante Jr. si retired police officer ag dating PCSO General Manager Royina Garma sa Quad-Committee hearing ro angot sa ginsueat it kolumnistang si Ramon Tulfo nga ginasugid nga relasyon ni Garma kay dating Pangulong Rodrigo Duterte.
Base sa ginsueat ni Tulfo nga binasa ni Cong. Abante sa hearing it Quad Comm, nagakadapat eamang sigon nga imbestigahan si Garma bangod raya ro sa likod it pagpatay kay PCSO Board Member Atty. Wesley Barayuga, sangka retired brigadier general nga miyembro it Philippine Military Academy (PMA) Class 1983.
Si Barayuga man bilang board member it PCSO ro humarang sa pagtao ni Garma it mga small town lottery (STL) franchises sa anang mga amigo. Kinastigo man it Quad Comm co-chairman si Garma kung matood o bukon nga may news black out kato sa asasinasyon ni Barayuga bangod sayod it imbestigador nga si Garma ag dating PRRD hay may relasyon.
Ginpabueaanan man ni Garma ro alegasyong may relasyon sanda it dating pangueo. Una kara, pilang mga resource person eon man ro tumestigo sa nakataliwan nga mga Quad Comm hearings sa pagiging maeapit nanday Garma ag dating Pangueong Duterte. Si ex-PRRD man sigon ro mismong nagbutang kay Garma sa PCSO ko 2019.
