KALIBO, Aklan—Gin-umpisahan eon it Muslim Community ro kapin sa tatlong adlaw nga selebrasyon it Eid’l Adha ukon Feast of Sacrifice.
Sa nasyon it Kuwait, ginpahayag ni Bombo International Correspondent Joy Escultura-Galvan nga mabahoe nga okasyon para sa mga Muslim ro Eid’l Adha kon sa siin raya ro kahigayunan nga nagatipon-tipon ro magpamilya, mag-abyan ag iba pang kakilaea nanda.
May mabahoe nga saeo-saeo nga ginapatigayon ro kada pamilya kadungan it andang kasadyahan.
Inde man suno kana maduea sa kultura ag tradisyon it mga Muslim ro pagpatay it sapat kaparehas it karnero bilang handa sa nasambit nga okasyon.
Mag-eowas kara, nagabisita sanda sa andang mga pamilya sa ibang lugar ag nagatao it mga regalo bilang pagpakita it andang pagpalangga, kalipay ag pakikipag-ugyon sa pamilya.
Samtang sa pihak nga parte, sa Dubai, United Arab Emirates hay ginpahilway it gobyerno ro ginatos ka mga preso ag ginpauli sa andang tagsa ka nasyon.
Ro nasambit nga hilimuon suno kay Bombo International Correspondent Jeffrey Fuentes hay kada dag-on ginahimo bukon eamang it sa nasambit nga nasyon kundi maging sa iba pang Muslim countries.
Ro nasambit nga mga preso hay akusado sa mga manaba nga kaso ag may manami nga performance sa sueod it kulungan rason nga nataw-an ro mga raya it parole ag natigayon nga mapahilway kon sa siin mismong ro gobyerno ro nagproseso hasta sa andang pag-uli sa andang natungdan nga nasyon.
Ro nasambit nga inisyatibo hay pakikipagbahin sa selebrasyon it Eid’l Adha kon sa siin uwa eon man it tyansa nga makabalik sa Dubai ro nasambit nga mga indibidwal.
