KALIBO, Aklan — Nag-enjoy sa andang Boracay tour ro mga turistang sakay it cruise ship nga Seven Seas Navigator nga nagdungka sa isla makaron nga adlaw.
Sa interview it Bombo Radyo, ginpahayag ni Caticlan jetty port administrator Nieven Maquirang nga haeos 80 porsiyento sa 400 pasahero hay nagpanaog sa barko ag naglibot sa white beach samtang ro iba hay nagpatigayon it island hopping activities.
Kaeabanan sa mga sakay kara hay retiradong American ag European.
Ginpahayag pa ni Maquirang nga ro mala-hotel nga barko hay nag-eayag halin sa Miami Florida ko Disyembre 2018 agud libuton ag ipamasyar ro mga pasahero kara sa nagkaeain-eain nga lugar sa kalibutan.
Nasayuran nga ko Pebrero 27, 2019 hay nagbisita man sa Boracayr o MV Star Legend sakay ro haeos 200 turista ag 164 nga crew.
