KALIBO, Aklan—Gindagsa it mga estudyante ag ginikanan ro Kalibo Pilot Elementary School sa unang adlaw it pagbukas it klase makaron nga adlaw it Lunes para sa School Year 2022-2023.
Suno kay Mr. Allan Relloto, Principal II it Kalibo Pilot Elementary School nga naging maayos ro pagsueod it mga unga sa eskwelahan apang may pila gihapon nga nagtaeang.
Agud nga mabuligan nga mapahagan-hagan ro daeagan it trapiko ag physical distancing, gintunga-tunga man nanda ro mga Grade level sa paga-sudlan nga gate, kun sa siin sa Mabini St. sa andang main gate, raya hay gintaeana para sa SPED ag Grade 3 learners samtang sa gate 2 sa may Roxas Avenue hay para sa mga Kindergarten, Grades 1, 2, ag 6 ag sa gate 3 sa may NAWASA tower hay Grades 4 and 5.
Gindesisyunan sigon nanda nga half day eamang ro klase nga maga-umpisa it alas-7 hasta alas 12 it udtro adlaw nga maga-cover sa tanan nga mga subjects.
Gindugang pa kara nga magapatuman sanda it blended learning pinaagi sa pagtunga sa daywang grupo it mga estudyante.
Magabueos-bueos ro daywang set it learners kada domingo sa pagpatigayon it “in-person classes” ag “modular learning”.
Haum man sigon ro andang mga safety measures kapareho it body temperature ag hand washing area para masigurong masunod ro minimum health protocols kamana man nga kinahang-ean magsusksok it face mask.
