KALIBO, Aklan—Gindayaw ag ginpasaeamatan it pilang mga overseas Filipino worker sa Singapore ro pagtau it importansiya kanda ni Pangueong Ferdinand “Bongbong” Marcos, Jr. sa anang unang state of the nation address ukon SONA ko Lunes nga adlaw.
Suno kay Bombo International Correspondent Mercy Cacan it Singapore nga gin-abangan, ginpamatian ag ginhimay nanda ro kaundan it SONA.
Nalipay sigon sanda sa ginhathat kara nga plano ag vision agud nga mabuligan ro mga OFWs sa masunod nga an-um nga dag-on it anang termino.
Partikular nga gintumod ni Cacan ro bag-ong lunsar nga Department of Migrant Workers nga ginakabig nanda nga baeay nga pwede sigon nandang madaeaganan sa oras it kalisod eabi eon it mga Pinoy nga nagatrabaho sa Middle East nga kaeabanan nga nakakaexperiensiya it pagmaltrato.
Mabahoe nga bagay man suno kana ro mandu ni Marcos nga obrahon nga automated ro pag-isyu it Overseas Employment Certificates ag pagproseso sa Contract Verification.
Samtang, ginahinyu man sigon nanda sa gobyero nga bawasan ro bayad sa pagproseso it andang mga papeles.
Problema man nanda nga kon naga-online appointment sa mga embahada ukon konsulada hay owa it naga-reply ukon nagasabat sa telepono.
Maswerte sigon kon masabat ro e-mail, apang nagahueat pa it maeawig nga tiempo.
Sa pihak nga parte, bukon suno kana it apektado it heatwave ro Singapore.
