KALIBO, Aklan—Ginduea it pamunuan it Beach Cleaners sa isla it Boracay ro pagkabaeaka it publiko partikular eon it mga turista ro uman nga pag-eutaw it maabu nga “green algae” ukon eumot sa baybayon it isla.
Raya hay matapos nga gin-istoryahan sa social media ro mga nagkalhit nga litrato kung siin makit-an ro maabu nga eumot.
Suno kay Mr. Garry Tubi, Supervisor it Beach Cleaners sa isla it Boracay nga makabig nga normal ro pagsueputan it mga eumot eabi eon kun tyempo it tag-init ukon summer season.
Suno kana, ro eumot hay sangka ordinaryong taean-awun sa isla ko mga unang tyempo maskin nga owa pa raya na-develop bilang sambilog sa mga sikat nga tourist destination sa bilog nga kalibutan.
Pagdepensa ni Tubi nga bukon raya it tuga it anumang higku bangud bukon pa it masyadong developed ro Boracay kumpara sa makaron nga tyempo.
Masami sigon nga kun high tide hay nagasaka ro eumot sa baybay samtang kun low tide hay nagapabilin raya sa bibi it baybayon.
