BALITA Espesyal–Nag-viral kan-o eamang sa TikTok ro pilang video kun sa siin makita ro sangka chef sa sangka food stall nga ginagisa sa bawang ag chili oil ro mga bato!
Suno sa mga food historians sa China, ro “Suodiu” hay pagkaon nga naimbento ko sinaunang paniempo it mga mangingisda sa Hubei province.
Kon ro mga mangingisda hay naubusan eon it makaon ag na-stranded sanda sa tunga it Yangtze River, maga-gisa sanda it mga bato gamit ro chili oil, garlic ag iba pang pampalasa.
Agud nga indi makabatyag it gutom, pagasuyupon nanda ro bato ag igaeu-ad kon owa eon raya it lasa.
Medyu nakakalipatan eon ro nasambit nga delicacy kat maimbento ro motorized boat ag naging madasig eon ro biyahe sa mga suba.
Apang makaron nga 2023, naging trend ro pagkaon kara sa China matapos makaangkon it 800,000 views ro sangka video kun sa siin ginapakita kon paalin raya nga ginakaon.
Maabu ro naintriga sa nasambit nga delicacy ag maabu ro pangutana it mga netizens matapos raya nga mag-viral.
Sambilog eon kara hay kon anong klase it bato ro ginagamit ag kon kinahangean baea nga ibalik sa baealigyaan kon tapos eon raya nga supsupon.
Suno sa chef nga naga-eaha kara, bato halin sa idaeum it suba ro ginagamit sa Suodiu bangud nga mag-eowas nga makinis raya, may lasa ag hugum raya nga matsa “seafood” kon gina-gisa sa mainit nga kaeaha.
Mabakae sa balor nga 17 yuan ukon (katumbas it P132) ro sangka serving it Suodiu sa mga night market sa China.