KALIBO, Aklan—Ginkilaea bilang passer it 2021 seal of good local governance for barangay it Department of the Interior and Local Government ukon DILG ro Poblacion, Kalibo.
Nasayuran nga kaibahan it Poblacion, Kalibo ro Barangay Laguinbanua, Ibajay; Dangcalan, Malinao; ag Barangay Talon sa banwa it Altavas.
Raya hay kasunod it manami nga pagdumaea it nasambit nga mga awardee kaeakip ro andang nagkaeain-eain nga mga proyekto ag programa.
Ginpahayag ni punong barangay Neil Candelario it Poblacion, Kalibo nga ginakabig nanda raya nga sambilog sa pinakamabahoe nga award nga andang nabaton.
Sa kabilugan suno kana nga masobra sa sang libu nga mga initial passers hay kapin sa 459 ro ginpasidunggan ag sambilog kara ro Poblacion, Kalibo.
Ginpasaeamatan man nana ro tanan nga nagtau it kontribusyon sa nabaton nga pasidungog.
Nauna kara, gin-congratulate ag gindayaw ni Governor Joen Miraflores ro nasambit nga mga awardee.
