Kalibo, Aklan-Ginklaro ni Kim Sin Tugna it Bagong Alyansang Makabayan nga bukon it kontra ro andang ginhiwat nga State of the People’s Address sa bilog nga nasyon kahapon nga adlaw kadungan sa ginhimo nga 3rd State of the Nation’s Address ni Pangueong Ferdinand Marcos Jr.
Katuyuan kara nga ipaabot ro mga hinaing sa pagpungko ni Pangueong Marcos Jr., raya hay may tema nga “Panagutin si Duterte at Singilin si Bongbong Marcos”.
Sa nagtaliwan sigon nga an-om nga dag-on nga nagpungko si Rodrigo Duterte hay maabong human rights violation ro nairecrecord ag grabe man ro corruption.
Ginpatuman man sa anang tyempo ro Rice Tarrification Law nga nagapatay sa mga mangunguma ag local traders.
Suno kay Tugna nga agud magbarato man ro mga baeak-eon hay mahimo nga ibasura ro mga Value Added Tax ag ro TRAIN Law.
Base kanda nga ro operasyon man it POGO hay uwa nanda ginapaburan nga rason sigon it illegal nga aktibidad, ngani nagakadapat nga papunduhon raya ag pasabton ro mga utok it POGO.
Samtang, nagakadapat gid man sigon nga pangapinan ni Pangueong Marcos ro soberanya ag patrimonya sa West Philippine Sea apang indi magsalig sa Estados Unidos.
Suno kana nga dapat kato pa eang ginhimo eun raya bangud sa pagclaim it China sa WPS.
Mabahoe man suno kana ro interes it Amerika ag China sa Pilipinas bangud sa pagiging strategic kara.
Paathag man nana nga napunggan it mga raya ro pag-umwad it nasyon kapareho sa agrikultura.
Sa pihak nga parte maeayo man sigon sa realidad ro mga ginpahayag ni Marcos sa anang SONA, kapareho it presyo it baeak-eon ag mga sweldo.
