KALIBO, Aklan—Ginpaidaeum eon sa inquest proceedings ro sangka 30-anyos nga ama nga nagbuno-patay sa anang an-um nga dag-on nga unga sa Barangay Bubog, Numancia ko nagtaliwan nga adlaw it Miyerkoles.
Suno kay P/Master Sergeant Felizardo Navarra it Numancia Municipal Police Station nga kasong parricide ro andang ginpasaka sa Aklan prosecutors office.
Owa suno kana it piyansa ro nasambit nga kaso ag kapareho it murder case, naga-abot sa 20 hasta 40 anyos nga pagkakulong ukon hasta nagakabuhi nga pagka-presu ro sentensiya.
Pursigido sigon ro misis nga sangka police officer nga maduso ro kaso bangud sa kaakig ag kasubo nga nabatyagan.
Ginapatihan nga bangud sa grabeng depression rason nga napatay it ama ro anang kaugalingon nga unga.
Nobyembre 2021 pa sigon hay owa eon naga-iba ro suspek ag ro anang misis sa alegasyon nga ginasakit imaw kara.
Nakaangkon it mutual agreement ro mag-asawa sa paghueam sa andang unga nga idtu naga-istar sa poder it anang lolo ag lola sa baeay it anang misis sa Brgy. Laguinbanua East, Numancia.
Sa post mortem examination ni Dr. Levens Maravilla, ro unga hay nag angkon it daywang igo it pagbuno sa waea nga dughan ag multiple nga stub wounds nga medyu manabaw eamang nga ginapatihan nga halin sa ice pick.
