KALIBO, Aklan—Ginpamalibaran it grupo it hair braiders sa Isla it Boracay nga overpriced ro ginhimo nga pagsaeapid sa buhok it sangka turistang dumueuong.
Suno kay Jomar Saan alyas Mara, lider it mga hair braiders sa isla ag miyembro it Malay Boracay Vendors, Peddlers, Masseurs, Manicurist and Hair Braiders Association, Inc. nga antes nga gin-umpisahan ro pagsaeapid sa buhok it nasambit nga turista hay ginpaathag sa anang ginikanan ro design ag kabilugan nanda nga pagabayaran.
Aminado si alyas Mara nga inabot gid man it P16,000 ro andang sukot bangud nga bilog nga buhok ro gin-braid ag gin-apply ro andang bag-ong design nga may nagkaeain-eain nga kolor sa kada sinaeapid nga buhok nga ro kada linya hay nagabalor it P50 hasta P100.
Kapin sa tatlo nga tawo sigon ro nagtrabaho sa mahabang buhok it andang naging kliyente nga nagbuhay it ap-at hasta limang oras.
Makabig sigon raya nga special design.
Ginpahayag dugang nga indi sanda pwedeng mag-overprice bangud nga may taripa sanda nga ginasunod.
Sa kamatuoran suno kana ro insidente hay natabu may daywang domingo eon ro nagtaliwan ag owa man it reklamo ro andang customer sa baylo hay kuntento ag nalipay sigon raya sa naging resulta.
Bihira eamang sigon ro makarondaya nga kahigayunan nga umabot it linibu ro bayad.
Matapos nga mag-trending ro nasambit nga post sa social media hay naging apektado sigon ro andang trabaho bangud sa mga negatibong komento.
Bangud sa insidente hay ginpatawag sigon ro andang grupo it lokal nga gobyerno it Malay ag municipal tourism office.
Nasayuran nga sangka manager it hotel ro nag-post sa social media kara, kun sa siin anang ginreklamo ro gina-alegar nga pagsukot it kapin sa P16,000 sa sambilog sa andang mga guests nga sangka dumueuong para sa pagsaeapid sa buhok it anang unga.
Madumduman nga antes ro kontrobersiyal nga hair braiding sa Boracay hay nauna eon nga naging trending ro Virgin Island sa Bohol bangud sa gina-alegar nga sobrang taas it presyo it mga pagkaon partikular ro seafood nga umabot it P26,100.
Nauna eon nga ginpromisa it sangguniang bayan it malay pinaagi kay SB member Alan Palma, Sr. nga paga-imbestigahan ro hitabu ag magahimo sanda it nagakaigo nga resolusyon ukon ordinansa nga magatau it proteksyon sa mga turista.
