KALIBO, Aklan—Ginpasiguro it barangay council it Pook, Kalibo nga pagatutukan ro ginpaabot nga reklamo may kaangtanan sa gina-aywan nga mga basura partikular ro mga debotelyang ilimnon sa kilid it baybay sa Pook jetty port.
Suno kay kagawad Denia Balgos it nasambit nga lugar nga igasuhestiyon nana nga magapatigayon it session sa oras nga mag-abot ro andang punong barangay halin sa seminar sa Palawan.
Nasayuran nga nauna eon nga ginareklamo it pilang residente ro pagtambay ag pag-inuman it mga pamatan-on sa jetty port, kun sa siin ro andan mga basura hay basta-basta eamang nga gina-aywan sa lugar.
Kan-o eamang ko nagtaliwan nga Valentine’s day hay daywang bag nga pangbabaye ro narekober sa lugar nga may sueod nga bote it mga aeak ag mga gamit sa eskwelahan.
Samtang, ginpahayag pa ni kagawad Balgos nga may nakatuka nga barangay tanod nga naga-ronda sa lugar.
Ro lugar hay gina-develop makaron bilang tourist destination rason nga ginabantayan agud nga indi maging eye sore sa mga bisita ro nagakalhit nga basura.
