KALIBO, Aklan—Ginpasiguro it Malay Municipal Police Station nga nakaalerto ro andang taeatapan agud nga bantayan ro seguridad sa padayon nga pagbuhos it mga turista sa Isla it Boracay partikular eun kahapon nga adlaw it Huwebes Santo.
Ginpahayag ni P/Lt.Col. Don Dicksie De Dios, hepe it Malay PNP Station nga naka full-alert status ro police visibility sa isla kun sa siin kapin sa 13,000 nga mga turista ro nailista kahapon.
Suno kay De Dios, kada 100 meter hay may mga police assistance desk nga naka stand-by partikular sa front beach agud nga masiguro ro seguridad it publiko.
Sa pihak nga parte, padayon sigon ro pagpatrolya it mga PNP personnel agud hugot nga maipatuman ro mga naga-eksister nga ordinansa sa nasambitan nga banwa kapareho eamang it pagbawae sa pag-inom ag pagpanigarilyo sa front beach.
Raya hay agud maipaabot sa mga turista ag pumueuyo nga nagapabilin nga matawhay ro peace and order sa isla.
