KALIBO, Aklan–Naging madinaeag-on ro ginpatigayun nga “Pili Aklan” political forum it Kapisanan ng mga Brodkasters ng Pilipinas (KBP)-Aklan Chapter para sa mga kandidato nga nagapadaeagan sa provincial level ko Abril 29 sa ABL Sports and Cultural Complex.
Suno kay KBP-Aklan Chapter Chairman Apolonio Zaraspe, malipayon ag nagapasaeamat imaw sa tanan nga mga kandidato nga nagsakdag sa andang imbitasyon.
Mabahoe sigon raya nga bulig sa mga pumueoyo para magiyahan sanda sa pagpili kung sin-o ro angay ag bagay nga ibutang sa pwesto.
Ro forum hay gin-organisa para mabatian it mga Aklanon ro programa ag plataporma de gobyerno it kada kandidato sa masunod nga tatlong dag-on.
Raya sigon ro kahigayunan para maipaathag it mga kandidato ro andang plano para sa kamaeayran it bilog nga probisya it Aklan.
Importante sigon nga masayuran it publiko ro pagkatawo it kandidato agud nga indi mauyang ro andang sagrado nga boto.
Nasaksihan man sa political forum ro mainitan nga pagbaeayluhan it opinion it mga kandidato angot sa pilang ka mga isyu partikular sa ginaduso nga Boracay Island Development Authority (BIDA) Bill.
Nasayuran nga ginpadaehan it KBP-Aklan Chapter it imbitasyon ro tanan nga kandidato sa provincial level apang may pila nga owa nakatambong.
