KALIBO, Aklan—Naging malinong ag matawhay ro unang tatlong adlaw nga implementasyon it Comelec checkpoint sa bilog nga probinsya it Aklan nga nag-umpisa ko Enero 9, 2022.
Suno kay Cripsin Raymund Gerardo, tagapaghambae it Comelec-Aklan nga kabulig nanda sa pagplastar it seguridad sa election period ro 17 ka estasyon it pulisya ag mga Comelec officer sa bilog nga probinsya.
Raya hay bilang preparasyon para masiguro ro maayos nga daeagan it national and local elections sa maabot nga May 9, 2022.
Nakabaehag sa gin-isyu nga Resolution No. 10741 it Comelec nga kinahang-ean nga may una nga maskin sambilog nga checkpoint sa kada siyudad ukon banwa.
Tuyo kara nga epektibong maimplementar ro firearms ban ag masiguro nga tama ro pagpatuman it search and seizure procedures kamana man nga indi ma-eabag ro civil, political ag human rights.
May kaangtanan kara, hugut man nga ginabawaean it komisyon ro pagdaea it baril, hinangiban ag iba pang mataeom nga bagay nga pwedeng makahalit sa iba sa pag-umpisa it election period hasta Hunyo 8, 2022.
Ginklaro ni Gerardo nga ‘visual search’ ro pagapasugtan ag bukon it required ro pagbukas it mga glove compartment, trunk ukon mga bag sa gintaeana nga Comelec checkpoints.
