KALIBO, Aklan—Ginpatawag it Traffic and Transport Management Division (TTMD) it lokal nga gobyerno it Kalibo ro ginasugid nga bastos nga tricycle driver matapos nga i-reklamo it ginikanan it sangka 14-anyos nga estudyante.
Kaibahan sa ginpatawag hay ro operator it tricycle nga asawa man it driver.
Nasayuran nga ginreklamo ro owa ginpangaeanan nga driver angot sa gina-alegar nga pag-istorya kara it kabastusan sa menor de edad partikular ro angot sa pakikipaghieawas samtang nga nagamaneho it anang saeakyan pauli sa baeay it estudyante sa Brgy. Andagao, Kalibo.
Nauna eon nga gindetalye it ama it estudyante ro natabu sa anang unga sa social media nga naging viral matapos nga maabu ro nag-share ag nag-react.
Sabado it gabi-i, Nobyembre 25 kat maaresto it mga awtoridad ro nasambit nga tricycle driver.
Sa pag-atubang nanda kay Ms. Vivien Briones, head it TTMD-Kalibo, may kaugalingon nga bersyon it istorya ro mag-asawa.
Apang nagpanindugan ro taeatapan nga indi eon pagapasugtan nga makabiyahe ro driver engkaso nga may matabu eon man nga kaparehong insidente.
