KALIBO, Aklan—Ginsuspende it kapin sa 15 diyas ro Federal parliament sa Australia nga nakataeana kunta nga magabalik sa masunod nga domingo kasunod sa pagkamatay ni Queen Elizabeth II.
Suno kay Bombo International Correspondent Denmark Suede it Sydney, Australia nga gin-anunsyo ni Prime Minister Anthony Albanese nga sobrang nagapangasubo ro Australia sa pagkamatay it reyna sa edad nga 96.
Gindugang pa it prime minister nga may espesyal nga lugar ro Australia sa tagipusuon ni Queen Elizabeth.
Si PM Albanese ag Governor-General David Hurley hay nakataeana nga magabiyahe sa London agud nga makipagkita sa maga-mana sa trono nga si King Charles III.
Ro mga bandera sa Parliament House ag iba pang Commonwealth buildings hay ginpa-ubos ag ginbutang sa half-mast umpisa kaina it agahon.
Nagpatigayon man it 96 gun salute sa guwa it Australian parliament kaina it agahon.
Si Elizabeth hay naging reyna it Britanya ag 14 nga iba pang mga nasyon sa ginatawag nga 15 commonwealth realms umpisa ko 1952, kaibahan ro Australia, Canada ag New Zealand.
Si Queen Elizabeth sigon ro andang head of state kun sa siin ro nagapanguna nana nga gahum hay magpatalsik sa nakapungko nga prime minister nga natabu eon ko 1975 sa Australia.
Nabutang sa trono si Elizabeth matapos nga mamatay ro anang ama nga si King George VI ko Pebrero 6, 1952, kat imaw hay 25 anyos pa eamang.
Imaw hay ginkoronahan ko Hunyo it masunod nga dag-on.
Si Winston Churchill ro unang punong ministro nga nagsirbi ko tiempo it anang pagdumaea.
Si Liz Truss nga nagpungko makaron nga domingo ro naging ika-15 nga prime minister sa idaeum ni Elizabeth.
