KALIBO, Aklan — Nabawi it mga tawuhan it Kalibo Municipal Police Station ro sangka tricycle nga gintakaw it owa nakilaeang suspek samtang raya hay nakaparking sa kilid it karsada, aga-aga it Lunes sa Brgy. Andagao, Kalibo.
Suno kay P/major Willian Aguirre , deputy chief of police it Kalibo MPS nga ro tricycle nga dating ginabiyahe nga may rotang Dongon Numancia hay naka-registered sa pangaean ni Jose Tafalla III, 36-anyos, tumandok it Brgy. Dongon East, Numancia ag presenteng naga-istar sa Brgy. Andagao. Kalibo.
Ginpa-blotter sigon ro pagkaduea it nasambit nga tricycle ag gin post man sa social media ro anang description.
Nakita man sa CCTV footage ro pagtakaw sa tricycle .
Pinaagi sa report it mga concerned citizen, nakita ro ginakahimtangan it tricycle nga gin-abandona sa kilid it estaka sa Brgy. Mobo, Kalibo, agahon it Miyerkules sa pagpati nga naubusan raya it gasolina.
May narekober pa sigon nga mga inihaw nga mais sa saeakyan nga matsa gingamit sa pag-excursion.
Ro tricycle hay sa kustodiya eon it Kalibo MPS ag nakataeanang i-turn-over sa Highway patrol group.//
