KALIBO, Aklan—Gintapos eon it Office of the Provincial Veterinarian ukon OPVET ro aplikasyon para sa mga gustong maka-avail it financial assistance halin sa provincial government matapos nga ginpaidaeum sa culling ro andang mga alagang baboy sa pagpanaeasa it African Swine Fever ukon ASF sa probinsiya it Aklan.
Suno kay provincial treasurer Berdandino Villaruel nga umpisa ko Agosto 31 hay ginsarado eon nanda ro aplikasyon.
Sa masobra P7 milyon pesos nga gintaeana it provincial government nga pondo nga igasuporta ag igabulig kunta sa mga local hog raisers nga apektado it ASF, kapin sa P4.2 milyon pesos ro nagastos ag P2.7 milyon pesos ro nabilin.
May mga nakahingabot pa suno kana nga mga local government units kahapon, apang kapin sa 300,000 pesos eamang ro nakataeanang iga-release nga pondo.
Ginklaru pa ni Villaruel nga ro owa na-disburse nga pondo hay indi eon pwedeng magamit ukon ma-divert it OPVET bangud nga kinahangean raya nga ibalik sa quick response fund it provincial government.
Posible sigon nga ginkueang ro gintaeana nga pondo kon naghueag it husto ro municipal agriculture office sa pag-asikaso it mga kinahangeanon nga dokumento.
Nasayuran nga 10 nga banwa ro nakabaton it nasambit nga ayuda.
Ro Tangalan LGU ro nakabaton it pinakamabahoe nga financial assistance nga naga abot sa P2.8 milyon pesos samtang ro banwa it Malinao ro may pinakamanaba nga kapin sa P6,000 pesos.
Nakadepende sigon sa local finance committee kon siin itaeana ro nabilin nga pondo.
