KALIBO, Aklan — Insigidang gin patibag ni Malay Mayor Ceciron Cawaling ro iga patukod kontang private port sa bahin it Bulabog Beach maeapit sa Aeta Village sa isla it Boracay.
Sa interview it Bombo Radyo Kalibo, gin pahayag ni Mayor Cawaling nga mabahoe ro posibilidad nga makaangkon it mga tagas it langis maghalin sa mga maga dungka nga sakayang pandagat ag mas pang maga higku ro tubi ag baeas sa nasambitang lugar.
Illegal man sigon ro konstraksyon kara bangud sa kawad-an it naga kaigong permit sa barangay ag munisipyo.
Nasayuran nga napansin it mga pumueoyo ro pagtukod it mga poste sa bibi it baybayon.
Suno pa sa alkalde nga padayun nandang gina tumod kun sin-o ag anong establisimento ro nagplano it pagtukod it pier it mga yate ag iba pang sea services sa nasambitang lugar.
