KALIBO, Aklan—Naturukan eon it Sinovac COVID-19 vaccine si Governor Florencio Miraflores kaibahan ro 10 alkalde sa probinsya it Aklan makaro nga adlaw sa ABL Sports and Cultural Complex sa Barangay Estancia, Kalibo, Aklan.
Kaibahan sa mga nagbaton it unang dose it bakuna si League of the Municipalities of the Philippines (LMP)-Aklan chapter president ag Ibajay Mayor Joen Miraflores, Mayor Denny Refol Jr. it Altavas, Mayor Garry Fuentes it Tangalan, Mayor Abencio Torres it Makato, Mayor Alfonso Gubatina it Madalag, Mayor Charito Navarrosa it Libacao, Mayor Lenneth Fernandez it Lezo, Numancia Mayor Jeserel Templonuevo ag Mayor Rodell Ramos it Batan.
Suno kay Mayor Joen Miraflores insigida sandang nagpabakuna matapos rebisahon it Inter-Agency Task Force on Emerging Infectious Diseases (IATF) ro andang polisiya ag pasugtan nga maturukan ro mga alkalde ag gobernador nga ginakabig nga high risk individuals.
Gin-eakip sanda sa nagapadayun nga pagbakuna sa mga A1 priority list ukon mga health care frontliners.
Sa adlaw it Huwebes paga-umpisahan ro pagbakuna sa mga senior citizen, may kapansanan ag may comorbidities ukon gina-angkon nga mga kondisyon.
Dugang pa ni Mayor Miraflores nga ro pitong mayor nga owa makaibahan sa inoculation hay nakataeanang bakunahan sa tagsa-tagsa ka mga vaccination roll-out.
