Maskin nga owa pa opisyal nga ginproklama, ginpasiguro eon ni presumptive president Ferdinand ‘Bongbong’ Marcos, Jr. nga pagataw-an it atensyon ro pagbutang it mga mayad nga economic advisers sa bago nana nga administrasyon.
Nasayuran naton ro importansiya it economic team eabi eon ag raya ro maga-asikaso sa pagbangon it ekonomiya halin sa pandemya hasta sa masunod nga mga dinag-on.
Angot kara, naka-abang eon ro mga investors ag negosyante sa kun ano ro magiging economic policies it administrasyong Marcos.
Mag-eowas sa pagbilog it mayad nga economic team, kinahangean man nga maging maabtik sa paga-obrahon nga pagpili it mga magiging miyembro it gabinete.
Pabor kita sa pahayag ni Marcos nga magiging bukas raya sa tanan, kaapin man ukon kaaway basta masarangan ro trabaho ag masaligan sa serbisyo-publiko.
Maabu nga mga problema nga paga atubangon ro bag-ong administrasyon bangud nga mag-eowas sa grabeng epekto it COVID-19 pandemic, may iba pang mga problema nga padayon nga naexperiensiyahan it nasyon.
Pilang bagyo man ro nag agi ag maabu nga pangabuhian ro naguba.
Nagaeaum kita nga masaea it mayad ro mga iga-appoint nga gabinite.
Bukon eamang it basta nga mayad kundi nga sa tagipusuon ro pagserbisyo sa nasyon.
Ginahinyu man sa publiko nga buytan ro atong obligasyon nga mag umpisa sa atong kaugalingon ag sa pamilya.
Magpabilin nga responsable, disiplinado ag makaangkon it direksyon.
Indi masarangan it gobyerno nga maga-isaeahanon nga mahaw-as ro nasyon.
Kinahangean ro bulig ag pagbuylog it kada pumueuyu.
