Makaron nga adlaw it huwebes hay pormal eon nga magabaylo it administrasyon.
Maabung Pinoy ro nagaeaum nga kadungan kara hay panibag-ong umpisa nga puno it pageaum.
Ro eubusan eon nga makabangon sa pandemya.
Angot kara, may hinyu si Pangueong Rodrigo Duterte kay President-elect Ferdinand ‘Bongbong’ Marcos, Jr.
Kunta hay padayunon ro mga proyektong nagapasadya sa pumueuyung Pilipino.
Gin engganyo pa it pangueo ro mga mamalidha nga i-offer kay Marcos ro anang mga proyekto kapareho it pabaeay para sa mga pigado, biktima it bagyo ag iba pang klase it kalamidad, mga indigenous people ag mga dating rebelde nga nagsurender sa gobyerno.
Nauna eon nga ginpahayag ni Marcos nga pagapadayunon nana ro mga programang naumpisahan ni Pangueong Duterte kapareho it Build, Build, Build program ag anti-drug war.
Makarondaya gid man dapat ro gobyerno.
Maskin nga magbaylo it pamunuan, padayun sa gihapon ro mga manami nga proyekto ag programa.
Kun may mga dapat bag-uhon para maging mas mapuslanon, obrahon eon.
Raya hay bukon man it isyu kon anyong administrasyon ro nag-obra it sangka proyekto.
Unang-una, raya hay trabaho it mga opisyal it gobyerno.
Ro kada sentimo nga ginagastos kara hay halin sa boesa it publiko.
Dapat eamang nga may obrahon sanda nga magapasadya ag magatau it kasoehayan sa publiko.
Sa pihak it mga pagsubok, manami nga nagasalig sa gihapon ro publiko sa gobyerno.
Una sa gihapon ro pageaum kadungan it pagtinguha .
